Luke 21
Naaro Bakaang Avuavuꞌ
(Mak 12:41-44)
1Jiisuuꞌke baakeenevuri oovurikoꞌnung mooniꞌ mmauꞌpoꞌnupoonge biikaang avuavuꞌ sipaako teke dootuuꞌnava pankava-koo. 2Eeꞌnoko teie teka nani naaro ataꞌoiꞌ oovuuꞌ mooniꞌning keura okiꞌning kuung sipuko. 3Eeꞌnoko teie bakaning barevare-nupoong aaꞌpuruꞌ, “Masikaꞌ naurampimang ninge, anie ataꞌoiꞌke naaroi aaꞌnaꞌ mmauꞌ sipuing ookara-ita. 4Teinge tee biikaang kapooꞌnanka mmauꞌketa sipaing, teka tenie tee ataꞌoiꞌketa ookara otoꞌevuining teni paku-koo makosining sipuing.”Arikananka Tavoꞌariaining-koo Jiisuuꞌ Bakaning Pakuariainaꞌ
(Mat 24:1-14; Mak 13:1-13)
5Niiꞌninge bakaning barevare-nupoong-koo pava dootuuꞌnava pankava teke minkuaakoꞌnung aaꞌpaama, “Bakei tampaꞌ oroꞌnava, kapang pipiꞌdaarie eeꞌnoko nepunepuꞌnanka avuavuꞌkooninge maantoꞌnavai.” 6Eeꞌnoko teeꞌ minkuaako Jiisuuꞌke aaꞌpuuꞌ, “Ooverimatomaing teing aing kapooꞌnanka naurampiaing: Doong pomaang teing aing kapananka tuurampaavainaꞌmung. Teinge piatooroi deroaama nareꞌ niiꞌnareꞌkoo daue panteꞌarioꞌ sipaavaukaꞌnung.”7Eeꞌnoko teinge napoꞌ niaꞌaama tee aaꞌpauꞌ, “Nau-anta ee, tee areꞌmoong teeꞌ nkoaravaing? Eeꞌnoko taaꞌniꞌanta aming teeꞌ nkoaraaꞌnaang dueꞌuko oo-koonge?” 8Eeꞌnoko teie aaꞌpuuꞌ, “Bakei tarerariri otoriaing nantoonge poo-antaraariꞌneeng, aiꞌ nantoong mmauꞌ nkaang miring tampaama porooꞌnaang aaꞌpaama, ‘Batei botu basiaring Tee Pakoꞌpariꞌniiꞌ toroaraaꞌnaang.’ Niiꞌnaꞌ eeꞌ, ‘Ning tee eeꞌnung.’ Teing teeꞌ kareavaining siompereriaukaꞌ. 9Eeꞌnoko tenang diiꞌke taaraverira karenanka eeꞌnoko nantoong biikaning taretarenanka paari-anta-koo turampeeko dankurankuꞌdariaukaꞌ, aiꞌ aing teing kapooꞌnanka teeꞌ oroꞌ tutung uroꞌke tavoꞌkuaining, teka botu namuꞌke tavoꞌkuaukaꞌnung.”
10Teketaꞌ aaꞌpuruꞌ teing, “Narung kansiꞌ iꞌamparama niiꞌnung kansiꞌ tavuainge, eeꞌnoko narung muuꞌ iꞌamparama niiꞌnung muuꞌ turampuainge. 11Tenang pankainanka uꞌmiꞌ nkoaravaing, eeꞌnoko anairu tenairu-koo doovang ninka peera-koo booroainge. Avorokesiꞌnanka eeꞌnoko pankeng taaꞌniꞌantananka paning-eta nkoariainge. 12Teka mmeꞌ aing eeꞌ oroꞌ tavoꞌkuaruko diiꞌ tee mooꞌdaarima daiꞌdaariaing mankiꞌantaraarima, dootuuꞌ tare-nupoong-anko tavoꞌdaarima eeꞌnoko kiimatanairu-koo siꞌdaariai. Eeꞌnoko dauraronanka eeꞌnoko ovoꞌmaꞌnuka-anko tavoꞌdaariai nkaang miring nkaverimaung-koo. 13Eeꞌnoko teeꞌ nkoraarima tampara doona araariai ning siraꞌmeriaing. 14Tee tee koontoꞌ okoteꞌdoriaing norunoruꞌ mmauꞌ nkoveriaꞌ otoriaing tuutunang~ nimpaꞌeriainaꞌ nemperi. 15Aiꞌ ninge tee arompiaing tee matau minkueriaing aaꞌnung turantaarining-koo narung makotuaꞌ diiꞌ makuꞌduriaing daang deeng-antarurima. 16Diiꞌ teing kare-nupoong-anko sing-antaraariaining bane ainge aaꞌninge: diumatakaampie eeꞌnoko diiꞌmarang eeꞌnoko teing diikanamuiaang eeꞌnoko diiꞌmaikororiꞌ eeꞌnoko niiꞌning diiꞌkoo teing dupisiꞌdaariaining. 17Eeꞌnoko napoꞌ munteꞌdaariai ookarai nkaang miring-koo. 18Teka tee diiꞌkoo daponaviꞌ naviꞌ diikaang boreꞌketa paaꞌaravaukaꞌnung. 19Teka purintariri otoriaing diiꞌ domantariainaꞌ.”
Jerusalemaꞌ Pesiꞌaravaing-koong Minkunaa Jiisuuꞌke Tampuuꞌnaꞌ
(Mat 24:15-21; Mak 13:14-19)
20“Teka tenang diiꞌke temono Jerusalemaꞌnamono piatooronukai koroaioꞌ ooverira tee noruꞌeriaing temono pesiꞌaravainaꞌmung emuꞌ dueꞌuing. 21Eeꞌnoko tenang teing aꞌ Judiaꞌnameng-koo otoroaining miinanka-koo deto bakei navoꞌka kooꞌariaing! Eeꞌnoko osi pankamono-koo kuung otoromaing mmariaavai, eeꞌnoko damaꞌdu-eta nantoong kuung tumpariaukaꞌ naroꞌka tavaariꞌneeng-koo. 22Aiꞌ teing aing doong teing Kumponing meroꞌaravaining teeꞌ nariꞌ Daari Meekung-koo daariari otoinaꞌ dupe-anta-koo. 23Bakei piaaruꞌnuka otoroaing teing kempoꞌnuka eeꞌnoko napoꞌ teing biurukaaꞌ noonooꞌkoo otoroaining, aiꞌ teing tapotaponuka, mmariꞌkoo makotuaꞌ. Teꞌmung teꞌmung paapaaꞌnaꞌmung avaro-koo, Kumponing bakaang iira aing-koo nantoong-koo tavoꞌarako. 24Teing-koo tee niiꞌning bainatue tooꞌpaarima niiꞌning daiꞌaarima avoraꞌtevoaraꞌke beꞌantavaariaing. Eeꞌnoko Jerusalemaꞌ teꞌ Juꞌdeeainge mmemmeꞌaavainooꞌ bera tenang teing biikanang doong oparavainange basi.”Tee Batei Jiisuuꞌ Toroaravaing-koong
(Mat 24:29-35; Mak 13:24-31)
25“Teketa tee taaꞌniꞌantananka oroꞌparavaing aing aaꞌning-koo duaaꞌ eeꞌnoko kaara, beentoꞌ. Eeꞌnoko anke kansiꞌkoo ookutunairu-koo tee nantoong domang aaꞌnaꞌ mankiꞌoroaing aaꞌnoaing-koo pirung tang korimparavai booꞌa taꞌdaꞌparama. ▼ 26Eeꞌnoko nantoong teing avoroꞌke kaiꞌantavuriaing, ookara kansiꞌ oraruꞌkuainooꞌ naroꞌ nempai. Aiꞌ teing purintoꞌnanka kapooꞌ paning-kooning teinge dankampuriaininge. 27Teka tenang teing aing ookara kapooꞌnanka nko tutumparako deto ookiriai ankantariri, aiꞌ tee batei ninge mooꞌdampiainang dueꞌdurimang; 28Eeꞌnoko tenang teinge ning Tee Naning-naumpoꞌ Paning-etaing oomaavaing purintoꞌ ninka moko kamoꞌka kuunge depeto aaꞌnaꞌ meenaꞌmoi.”29Teketa Jiisuuꞌke narung kara dikitoꞌ nau-antavuruꞌ, aaꞌpuma, 30“Tee baisi dovang nenuvaraꞌuko ooverima eeꞌ noruꞌerikooꞌ teketa deto puaravuuꞌnaang dueꞌka. 31Teeꞌ nariꞌ napoꞌ diiꞌke teing aing kapooꞌnanka naurampirining tavoꞌkuko ooverira tee noruꞌeriaing Kumponing bakaang muuꞌ tee dueꞌ pomaang. 32Masikaꞌ naurampimang ninge diiꞌ, aing enanavarang mmeꞌ paaꞌariaruko nkoaravaing teing aing kapooꞌnanka ookara. 33Paning eeꞌnoko kansiꞌ teing paaꞌareaining, teka nkaang kara tee paaꞌaravaukaꞌnung.
34“Teka domang pinkaꞌdariri otoriai Kumponing-koo dompirompiꞌdariainaꞌ. Tamung iriꞌ oꞌdariaukaꞌ paroro narung naierima, purintoꞌnaruꞌke kanuꞌdarima, eeꞌnoko kansiꞌkoong mankiꞌnanka-koo norunoruꞌdarima, teeꞌ tarerariaruko teꞌmung taꞌnimpaariiꞌnaꞌ taaviꞌduriꞌneenga. 35Aiꞌ teꞌmung doong teꞌmung ookutunairu dakaꞌpui tavoꞌaravainaꞌmung. 36Teka ookara batei-koo tanatarariri otorimaatoai, kunsirarima aing ookara kapooꞌnanka-koo purintariri divuꞌeriainaꞌ eeꞌnoko ning-koo, Tee Naning-naumpoꞌ Paning-etaing-koo, uroꞌkanooꞌ tampaꞌ donkoniriainaꞌ.”
37Ookara batei-koo tee Jiisuuꞌke Dootuuꞌnava-koo Pankava-koo nau-antavurikoꞌ, eeꞌnoko muunga tenkenuma Oliveꞌpoꞌnamii tampaamanamii-koo teke otoi daunaꞌmung nempukoꞌ. 38Eeꞌnoko taneꞌpuko oraꞌka ookara nantoong dootuuꞌnava pankava-koo porokoꞌ tee taaravaavaꞌnaang daankiarako teke.
Copyright information for
NAS